ਅਮਰੀਕਾ ਦੀ ਫ਼ੌਜੀ ਛਾਉਣੀ ’ਚ ਮੇਜਰ ਨੇ ਅੰਧਾਧੁੰਦ ਗੋਲੀਆਂ ਚਲਾ ਕੇ 13 ਜਾਨਾਂ ਲਈਆਂ

ਕਿਲੇਨ, ਟੈਕਸਾਸ : ਅਮਰੀਕਾ ਦੇ ਰਾਜ ਟੈਕਸਾਸ ਵਿਚ ਸਥਿਤ ਦੁਨੀਆਂ ਦੀ ਸਭ ਤੋਂ ਵੱਡੀ ਫੌਜੀ ਛਾਉਣੀ ਫੋਰਟ ਹੁਡ ਵਿਖੇ ਅਮਰੀਕਾ ਦੀ ਫੌਜ ਦੇ ਮੇਜਰ ਨੇ ਅੰਧਾਧੁੰਦ ਗੋਲੀਆਂ ਚਲਾ ਕੇ 13 ਵਿਅਕਤੀਆਂ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ। ਇਸ ਘਟਨਾ ’ਚ 30 ਵਿਅਕਤੀ ਜ਼ਖਮੀ ਵੀ ਹੋਏ। ਅਮਰੀਕਾ ਵੱਲੋਂ ਇਰਾਕ ਅਤੇ ਅਫਗਾਨਿਸਤਾਨ ’ਤੇ ਕੀਤੀ ਗਈ ਫੌਜੀ ਕਾਰਵਾਈ ਦੌਰਾਨ ਮੁੱਖ ਅੱਡੇ ਵਜੋਂ ਵਰਤੀ ਗਈ ਇਸ ਫੌਜੀ ਛਾਉਣੀ ’ਤੇ ਹਮਲਾ ਕਰਨ ਵਾਲੇ ਮੇਜਰ ਦੀ ਪਛਾਣ ਨੀਡਾਲ ਮਲਿਕ ਹਸਨ ਵਜੋਂ ਹੋਈ ਹੈ, ਜੋ ਕਿ ਫੌਜ ’ਚ ਮਨੋਵਿਗਿਆਨੀ ਸੀ।ਛਾਉਣੀ ਦੇ ਕਮਾਂਡਿੰਗ ਅਧਿਕਾਰੀ ਲੈਫਟੀਨੈਂਟ ਜਨਰਲ ਰੋਬਰਟ ਕੋਨ ਨੇ ਦੱਸਿਆ ਕਿ ਕਰੀਬ ਡੇਢ ਵਜੇ ਹਮਲਾਵਰ ਨੇ ਛਾਉਣੀ ’ਚ ਗੋਲੀਆਂ ਚਲਾਈਆਂ। ਹਮਲਾਵਰ ਕੋਲ ਦੋ ਹਥਿਆਰ ਸਨ ਅਤੇ ਉਸ ਨੇ ਨੌਜਵਾਨ ਫੌਜੀਆਂ ਨੂੰ ਨਿਸ਼ਾਨਾ ਬਣਾਇਆ। ਉਕਤ ਹਮਲਾ ਛਾਉਣੀ ਦੇ ਉਸ ਪਾਸੇ ਹੋਇਆ ਹੈ, ਜਿੱਥੇ ਵਿਦੇਸ਼ੀ ਧਰਤੀ ’ਤੇ ਤਾਇਨਾਤ ਕੀਤੇ ਗਏ ਫੌਜੀਆਂ ਦੀ ਡਾਕਟਰੀ ਜਾਂਚ ਹੁੰਦੀ ਹੈ। ਫੌਜ ਦੀ ਕਾਰਵਾਈ ’ਚ ਹਮਲਾਵਰ ਨੂੰ ਵੀ ਗੋਲੀਆਂ ਲੱਗੀਆਂ ਅਤੇ ਉਹ ਹਸਪਤਾਲ ’ਚ ਬੇਹੋਸ਼ ਹੈ।