ਸਰਕਾਰ ਦੀ ਨਾ ਨੁੱਕਰ ਦੇ ਬਾਅਦ ਇੰਡੀਅਨ ਕ੍ਰਿਕਟ ਲੀਗ ਨੂੰ ਮਿਲੀ ਹਰੀ ਝੰਡੀ

ਪਰ ਚੋਣਾਂ ਵਾਲੇ ਦਿਨ ਨਹੀਂ ਹੋਣਗੇ ਮੈਚ

ਮੁੰਬਈ : ਬਿਆਨਬਾਜ਼ੀ ਅਤੇ ਅੜਚਨਾਂ ਦੇ ਬਾਅਦ ਹੁਣ ਸਾਫ ਹੋ ਗਿਆ ਹੈ ਕਿ ਭਾਰਤ ਵਿਚ ਖੇਡੇ ਜਾਣ ਵਾਲੀ ਇੰਡੀਅਨ ਕ੍ਰਿਕਟ ਲੀਗ (ਆਈਪੀਐਲ) ਮੁਕਾਬਲੇ ਚੋਣ ਮਹਾਂਕੁੰਭ ਦੇ ਬਾਵਜੂਦ ਹੋਣਗੇ। ਆਈਪੀਐਲ ਦੀਆਂ ਤਰੀਕਾਂ ਵਿਚ ਤਬਦੀਲੀ ਕੀਤੀ ਜਾ ਰਹੀ ਹੈ ਅਤੇ ਹੁਣ ਮੈਚ ਚੋਣਾਂ ਦੀਆਂ ਤਰੀਕਾਂ ਵਾਲੇ ਦਿਨ ਨਹੀਂ ਹੋਣਗੇ। ਆਈਪੀਐਲ ਦੇ ਕਮਿਸ਼ਨਰ ਲਲਿਤ ਮੋਦੀ ਨੇ ਐਲਾਨ ਕੀਤਾ ਹੈ ਕਿ ਚੋਣ ਅਤੇ ਵੋਟਾਂ ਪੈਣ ਦੇ ਦਿਨ ਕੋਈ ਵੀ ਮੈਚ ਨਹੀਂ ਖੇਡਿਆ ਜਾਵੇਗਾ। ਮੋਦੀ ਨੇ ਕਿਹਾ ਕਿ ਮੈਚਾਂ ਦੀ ਸੂਚੀ ਵਿਚ 14 ਸ਼ਹਿਰ ਪਹਿਲਾਂ ਤੋਂ ਹੀ ਸ਼ਾਮਲ ਹਨ ਅਤੇ 8 ਸ਼ਹਿਰ ਹੋਰ ਇਨਾਂ ਵਿਚ ਸ਼ਾਮਲ ਕੀਤੇ ਜਾਣਗੇ।ਗੌਰਤਲਬ ਹੈ ਕਿ ਆਈਪੀਐਲ ਦੀ ਸ਼ੁਰੂਆਤ 11 ਅਪ੍ਰੈਲ ਤੋਂ ਸ਼ੁਰੂ ਹੋਵੇਗੀ ਅਤੇ ਲੋਕਸਭਾ ਚੋਣਾਂ ਦੇ ਤਹਿਤ ਪਹਿਲੇ ਪੜਾਅ ਦੀਆਂ ਵੋਟਾਂ 16 ਅਪ੍ਰੈਲ ਨੂੰ ਪੈਣਗੀਆਂ। ਵੋਟਾਂ ਦੀ ਗਿਣਤੀ ਅਤੇ ਨਤੀਜੇ 17 ਮਈ ਨੂੰ ਆਉਣਗੇ ਜਦਕਿ ਲੀਗ ਦਾ ਫਾਈਨਲ ਮੁਕਾਬਲਾ 24 ਮਈ ਨੂੰ ਖੇਡਿਆ ਜਾਵੇਗਾ।